عدى عليا كتير من الناس تسأل على الأجهزة وحبيت أوضح رأى فيهم.
الأجهزة أنتهي عمرها الأفتراضي وعفى عليها الزمان ، وشرب عليها و حبس بكباية شاي. الناس فى الدول المتقدمة بره بتشترى اى جهاز كان نوعه اتش بى او لينوفو ... الخ..
وبيتستهلكوه سنة أو أثنين وبعدين بيحطوه فى الزبالة وبتروح لامااكن حفظ الأجهزة المنتهية الصلاحية فى الطريق لأعادة تدويرها، طيب أيه اللى بيحصل والاجهزه دى بتوصلنا مصر أزاى ؟
التاجر المصري الحرش بيسافر للخارج عند اى مكان من دول ويقول لصاحب المكان : أنا هشيل الليله دى ، يرد عليه : وأنا عايز أخلص من القرف دة ، يقوم التاجر المصري ياخد الزباله قصدى البضاعه دي فى كونتينر كبير وأشحن على مصر ، ويبتدى بقى يفرز البضاعة ، شاشات LCD عمرها منتهى واحدة فيها كام خدش فى الفريم يلمعها وينضفها ويلفها بسوليفان ( أهم حاجة السلفانه) ويستنى الزبون من الناس اللى مش فاهمه ويقوله بص يا معلم دى شاشة اتش بى أورجينال مش من الكلام الفاضى اللى موجود فى السوق حاليا كله تعبان دى بقى الأصلى ، الزبون طبعا – أسف فى التعبير – يريل على نفسه ويشترى علطول.
يكمل التاجر فى الفرز ، كيسه مفيهاش هارد تعبان 80 جيجا يحطلها هارد وينفخها هواء ويلمعها من بره ويرش لون علشان الرطوبة وبرضة توصل لمرحلة السولفان ، يدخل الزبون : أنا عاوز كيسة أورجينال ، البائع ( أهلا وسهلا: أنت تأمر حضرتك ، عارف أسعار الكمبيوترات ؟ لأ قولنا : البائع يقوله : بتبدى من مش عارف ألف وكام وتنتهى بكام ، الزبون يقوله دى أستعمال خارج ، يرد التاجر : اه بس أحسن ألف مرة من الأجهزة الزبالة اللى بتتباع اليومين دول ، دى اتش بى عارف يعنى أيه اتش بى؟؟ ويقوله بص على اللوجو الاصلى ، الزبون يلاقيها بتبرق يتسطل علطول ويتمزج وميقتنعش باى جهاز فى الدنيا الأ لما يبقى أوريجينال ويخرج بعد ما انضحك عليه بالجهاز الأورجينال التعبان اللى غالبا مش هيكمل معاه نص سنة.
بالنسبة لرأى الشخصى فى الموضوع بعيدا عن المصايب والبلاوى اللى بنشوفها كل يوم من التجار بتوع مصر، الأجهزة دى عمرها أنتهى وخلاص مبقتش صالحة للأستخدام ، فلو أفترضنا جدلا أنها بتبلى الغرض فلازم يكون سعرها كويس جدا جدا ولكن العكس هو الصحيح فتلاقى اللاب دلوقت وصل حوالى 3000 جنيه مصرى واستيراد خارج ! يانهار أسود الجهاز دة أخره لو أتنطط ميجبش 300جنية دة كمان مع أستعمال الرأفة. وتلاقى الزبون مبسوط والتاجر مبسوط أنه ضحك على الزبون المبسوط وأهم شئ انه عطى ليه الجهاز.
تانى حاجة الشاشات التعبانة على الرغم من أنها أل سى دى الأ أنها تلاقيها زمن التأخير فيها 15 ملى ويمكن اكتر كمان وبالتالى هتشوف أحسن صورة روعة فى الأفلام ، بالأضافة إلى الأضاءة التعبانة بتاعتها لو محتاج تتأكد جربها على فيلم صورته غامقة مش باين منها اى شئ الأ أشباح هههههه، أما عن الالوان فحدث ولاحرج ، روح لأى حد من التجار وشوف الشاشات فى المعرض وشغالة وكلهم من نفس النوع هتلاقى كل شاشة منهم ضاربة لون على مزاجها على الرغم من أنهم نفس الموديل ونفس الحجم ! كل دة وفى النهاية تلاقى الشاشة ال 17 بوصة بتتباع ب 900 جنيه مصرى !!! للدرجة دى بقينا لعبة فى أيد التجار والقادم اسود
ليست هناك تعليقات:
إرسال تعليق